Með skatt­skyldu einstaklinga er átt við skyldu til að greiða tekjuskatt hér á landi sam­kvæmt lögum nr. 90/2003, um tekju­skatt með síðari breytingum. Fjallar 1. gr. þeirra um ótak­mark­aða skatt­skyldu manna, sem heimilis­fastir eru hér á landi, en samkvæmt lagagreininni hvílir skattskyldan á eftirtöldum mönnum:

1. Þeim sem heimilisfastir eru hér á landi.
2. Þeim sem heimilisfastir hafa verið hér á landi en flutt úr landi og fellt hafa niður heimilisfesti sitt hér, nema þeir sanni að þeir séu skattskyldir í öðru ríki á sama hátt og menn heimilisfastir þar og hafi fullnægt þeim skattskyldum sínum. Skattskylda þessi gildir þó aðeins í þrjú ár frá næstu áramótum eftir brottflutningsdag.
3. Þeim sem dvelja hér á landi lengur en samtals 183 daga á sérhverju 12 mánaða tímabili, þar með talin eðlileg fjarvera héðan af landi vegna orlofs og þess háttar.
4. Þeim sem eigi falla undir ákvæði 1.–3. tölul. þessarar greinar en starfa samtals lengur en 183 daga á sérhverju 12 mánaða tímabili, þar með talin eðlileg fjarvera frá starfi vegna orlofs og þess háttar, um borð í loftfari eða skipi sem skráð er hér á landi.

Við ákvörðun á skyldu manna til að greiða tekju­skatt þarf að taka til­lit til þeirra samninga sem ríkis­stjórnin hefur gert við stjórnir annarra ríkja til að koma í veg fyrir tví­sköttun á tekjur og eignir, sbr. þær heimildir sem fram koma í 119. gr. skattalaga.