nr. 1997 - 8

I. KAFLI.
Skilgreining.
1. gr.

Hlutafélagi og einkahlutafélagi er heimilt að gefa út jöfnunarhlutabréf og ákveða jöfnunarhluti án þess að slík útgáfa teljist til tekna hjá hluthafa, sbr. það sem nánar greinir í reglum þessum. Jöfnunarhlutabréf er í reglum þessum samheiti fyrir jöfnunarhlutabréf hlutafélaga og jöfnunarhluta einkahlutafélaga. Með félagi er í reglum þessum átt við hlutafélag og einkahlutafélag.

2. gr.

Heimild til útgáfu jöfnunarhlutabréfa takmarkast af þeirri fjárhæð sem lægri er samkvæmt a. og b. liðum þessarar greinar:

a. Raunvirði hreinnar eignar í árslok 1996 sbr. 6., 7. og 8. gr.

b. Hækkun á nafnverði innborgaðs hlutafjár og/eða lækkun á nafnverði útborgaðs hlutafjár eftir árslok 1978. Hafi félag verið stofnað fyrir árslok 1978 skal heimild til útgáfu jöfnunarhlutabréfa á árinu 1979, sbr. 3., 4. og 5. gr., framreiknuð. Við framreikning þennan bætist hækkun á nafnverði hlutafjár í árslok 1978. Hækkun og framreikningur samkvæmt þessum lið skal vera samkvæmt vísitölu jöfnunarhlutabréfa til 1. janúar 1997.

II. KAFLI.
Mat á raunvirði hreinnar eignar í árslok 1978.
3. gr.

Við mat á raunvirði hreinnar eignar félags sem stofnað var fyrir árslok 1978 ber fyrst að líta til eigin fjár í efnahagsreikningi í árslok 1978. Tilgreina ber fjárhæð höfuðstólsins, eins og hann var talinn fram til skatts, ásamt hækkun eða lækkun samkvæmt þessum kafla.

4. gr.

Til hækkunar höfuðstóls, sbr. 3. gr., koma eftirtaldir liðir:

a. Mismunurinn á endurmati varanlegra rekstrarfjármuna sem framkvæmt var á árinu 1979, eða heimilt hefði verið að framkvæma á því ári, og bókfærðu verði þeirra. Í stað endurmatsfasteigna er heimilt að nota brunabótamat og samsvarandi vátryggingaverð skipa og flugvéla 1. janúar 1979.

b. Aukaafskriftir sem færðar eru undir eigið fé í efnahagsreikningi.

c. 34,35% af niðurfærslu birgða og viðskiptakrafna.

d. Hafi félag átt hlut í öðru hlutafélagi í árslok 1978 og fyrir liggur heimild þess félags til útgáfu jöfnunarhlutabréfa, er heimilt að bæta heimild síðarnefnda félagsins við höfuðstólinn.

e. Hafi félag sameinast öðru félagi samkvæmt ákvæðum 56. gr. laga nr. 75/1981, um tekjuskatt og eignarskatt, skal félagið taka við öllum skattaréttarlegum skyldum og réttindum þess félags og þar með heimild til útgáfu jöfnunarhlutabréfa sem bætist við höfuðstólinn.

5. gr.

Til lækkunar höfuðstóli, sbr. 3. gr., koma eftirtaldir liðir:

a. Varasjóður telst ekki til hreinnar eignar varðandi jöfnunarhlutabréfaheimild, sbr. ákvæði til bráðabirgða í lögum nr. 75/1981. Varasjóðstillag vegna rekstrarársins 1978 kemur því til lækkunar hafi það ekki verið fært af höfuðstóli í varasjóð í efnahagsreikningi 1978.

b. Álögð opinber gjöld vegna rekstrarársins 1978 umfram áætluð gjöld.

c. Leigulóðir.

d. Gengistap, hafi það verið fært sérstaklega sem eign í efnahagsreikningi.

e. Bókfærð viðskiptavild.

III. KAFLI
Mat á raunvirði hreinnar eignar í árslok 1996.
6. gr.

Endurmatsreikningur í árslok 1996, eins og hann er talinn fram til eignarskattsstofns, skal vera viðmiðunargrunnur við mat á hreinni eign ásamt hækkun eða lækkun samkvæmt þessum kafla.

7. gr.

Til hækkunar endurmatsreikningi, sbr. 6. gr., koma eftirtaldir liðir:

a. Óráðstafað eigið fé eins og það er talið fram til eignarskattsstofns.

b. Lögbundinn varasjóður.

c. Mismunur á brunabótamati fasteigna í árslok 1996 eða vátryggingaverði skipa og flugvéla og bókfærðu verði þeirra á því tímamarki.

d. Aukaafskriftir vegna fasteigna eða skipa og flugvéla sem færðar eru undir eigið fé í efnahagsreikningi ef brunabótamat eða vátryggingaverð er notað í stað bókfærðs verðs.

e. 67% af niðurfærslu viðskiptakrafna.

f. Hafi félag átt hlutabréf í hlutafélagi eða einkahlutafélagi í árslok 1996 og heimild þess félags til útgáfu jöfnunarhlutabréfa liggur fyrir má bæta fjárhæð hennar við heimild síðarnefnda félagsins.

Ef skráð hefur verið markaðsgengi í árslok 1996 á hlutabréfum félagsins í viðkomandi hlutafélagi skal nota markaðsverðið í stað nafnverðs hlutabréfa eignarinnar.

8. gr.

Til lækkunar endurmatsreikningi, sbr. 6. gr., koma eftirtaldir liðir:

a. Ójafnað eigið fé eins og það er talið fram til eignarskattsstofns.

b. Álögð opinber gjöld vegna rekstrarársins 1996 umfram áætluð gjöld.

c. Leigulóðir.

d. Viðskiptavild.

IV. KAFLI.
Jöfnunarverðmæti hlutabréfa.
Skilgreining.
9. gr.

Jöfnunarverðmæti hlutabréfa skal vera nafnverð þeirra í árslok 1996 að viðbættri heimild til útgáfu jöfnunarhlutabréfa á árinu 1997.

Útreikningur jöfnunarverðmætis.

10. gr.

Gera skal grein fyrir útreikningi jöfnunarverðmætis með framtalsskilum á árunum 1997, 1998 eða 1999. Skal skattstjóri staðfesta útreikninginn.

Ríkisskattstjóri skal gefa út reglur og útbúa eyðublöð.

Jöfnunarverðmæti, án framreiknings, skal árlega tilgreina á skattframtali hlutafélagsins og á hlutafjármiðum.

Jöfnunarverðmæti varðandi söluhagnað hlutabréfa.

11. gr.

Hafi seljandi hlutabréfa eignast hin seldu hlutabréf fyrir 1. janúar 1997 skal kaupverð bréfanna ákvarðast sem jöfnunarverðmæti þeirra án framreiknings eða sem upphaflegt kaupverð þeirra framreiknað til ársloka 1996 samkvæmt verðbreytingarstuðli skv. 26. gr. laga nr. 75/1981, um tekjuskatt og eignarskatt, ef það er hærra.

Hjá þeim sem eignast hin seldu hlutabréf eftir 1. janúar 1997 telst söluhagnaður mismunur á söluverði og kaupverði, óframreiknuðu.

Hafi félag ekki reiknað út jöfnunarverðmæti og skilað útreikningi í síðasta lagi með skattframtali 1999 og fengið staðfestingu skattstjóra skal jöfnunarverðmæti við sölu bréfanna vera nafnverð þeirra í árslok 1996.

Jöfnunarverðmæti varðandi arðsúthlutun.

12. gr.

Arður sem félag greiðir út er frádráttarbær frá tekjum þess að hámarki 7% af nafnverði hlutafjár, sbr. 8. tölul. 31. gr. laga nr. 75/1981. Frádrátturinn miðast við nafnverð og þurfa hlutafélög að gefa út jöfnunarhlutabréf til að jöfnunarverðmætið nýtist varðandi arðsfrádrátt.

13. gr.

Hlutafélagi er heimilt að gefa út jöfnunarhlutabréf, þannig að skattfrjálst sé hjá hluthöfum, allt að því að heildarnafnverð hlutafjár nái jöfnunarverðmætinu. Útgáfan verður að vera í samræmi við ákvæði hlutafélagalaga.

Einkahlutafélögum nægir að tilkynna nýtt nafnverð til hlutafélagaskrár.

Varðandi útgáfu jöfnunarhlutabréfa tekur jöfnunarverðmæti breytingum samkvæmt verðbreytingarstuðli, sbr. 26. gr. laga nr. 75/1981, enn fremur tekur breytingin þeirri hækkun sem verður á innborguðu hlutafé eftir 1. janúar 1997.