Skattar vegna fjármálaþjónustu

Fjársýsluskattur

Fjármálafyrirtæki, verðbréfafyrirtæki og tryggingafélög, auk Íbúðalánasjóðs, bera fjársýsluskatt. Skatturinn er 5,45% og stofninn eru allar tegundir launa og þóknana. Skattinum skal skila mánaðarlega í staðgreiðslu.
Nánar um fjársýsluskatt

Sérstakur fjársýsluskattur

Þessi skattur er 6% viðbótar tekjuskattur á tekjuskattsstofn umfram 1.000 milljónir króna og er lagður á sömu aðila og bera fjársýsluskatt. Standa skal skil á mánaðarlegum fyrirframgreiðslum á tekjuárinu.

Sérstakur skattur á fjármálafyrirtæki

Skylda til að greiða sérstakan skatt hvílir á fjármálafyrirtækjum sem hafa fengið starfsleyfi sem viðskiptabanki, sparisjóður eða lánafyrirtæki og á öðrum þeim sem fengið hafa leyfi til að taka við innlánum.
Skatturinn er 0,041% og stofninn eru heildarskuldir samkvæmt skattframtali.
Sjá lög nr. 155/2010

Viðbót við sérstakan skatt á fjármálafyrirtæki

Við álagningu opinberra gjalda 2012 og 2013 skal til viðbótar við sérstakan skatt á fjármálafyrirtæki leggja á 0,0875% skatt. skattstofninn er sá sami. Gjalddagi er 1. nóvember á gjaldári og fyrirframgreiðsla 1. nóvember á tekjuári.

Sérstakt gjald á lífeyrissjóði

Við álagningu opinberra gjalda 2012 og 2013 skal 0,0814% gjald lagt á lífeyrissjóði. Gjaldstofninn er hrein eign til greiðslu lífeyris. Gjalddagi er 1. nóvember. (Lífeyrissjóðir bera ekki fjársýsluskatta.)
Fyrirframgreiðsla vegna 2012 er 31. desember 2011 og fyrirframgreiðsla vegna 2013 er 1. nóvember 2012.