Bindandi álit nr. 7/05

Tilefni:

Með bréfi umboðsmanns álitsbeiðanda dagsettu 12. júlí 2005 er óskað bindandi álits ríkisskattstjóra. Í álitsbeiðninni er frá því greint að álitsbeiðandi hyggist, ásamt A fjárfestingafélagi ehf., stofna eignarhaldsfélag í formi hlutafélags eða einkahlutafélags og leggja fram sem greiðslu hlutafjár í því félagi, hlutabréf sín í X hf. (hér eftir nefnt X). Við þá afhendingu hlutabréfa í X muni myndast mjög mikill skattskyldur söluhagnaður. Álitaefnið er afmarkað við skattalega meðferð þess hagnaðar.

Ríkisskattstjóri telur að fullnægt sé skilyrðum laga nr. 91/1998, um bindandi álit í skattamálum, fyrir því að hann gefi bindandi álit sitt af þessu tilefni.

Málavextir.

Í álitsbeiðni er greint frá eignatengslum álitsbeiðanda og A fjárfestingafélags, tilurð félaganna og eignarhlutdeild þeirra í X. Þá er greint frá því, að tilgangur með hinni fyrirhuguðu ráðstöfun sé að koma á eina hönd hlutabréfum beggja félaganna í X, til samræmis við viðhorf Fjármálaeftirlits og Kauphallar Íslands til samanlagðs eignarhalds þeirra á hlutabréfunum.

Tiltekið er að álitsbeiðandi hafi alla tíð aflað hlutabréfa einungis til langtímafjárfestingar. Hann hafi síðast keypt hlutabréf á árinu 2003 og síðast selt hlutabréf á árinu 2002. Hluta umræddra hlutabréf í X hafi álitsbeiðandi átt frá á árinu 1984, en aukið hlut sinn með kaupum á árinu 2002 og með samruna við nafngreind systur- og dótturfélög á árinu 2004. Þá er tiltekið að álitsbeiðandi hafi allt frá stofnun hagað skattskilum sínum, að því er hlutabréfaviðskipti varðar, í samræmi við núgildandi ákvæði 18. gr. laga nr. 90/2003. Ennfremur er tiltekið að meginþorri tekna álitsbeiðanda séu arðstekjur.

Með vísan til 5. mgr. 18. gr. laga nr. 90/2003, um tekjuskatt og eignarskatt, telur álitsbeiðandi sér heimilt að "fresta tekjufærslu söluhagnaðar hlutabréfanna og færa hann til lækkunar á stofnverði hlutabréfa í eignarhaldsfélaginu sem kaupa mun umrædd hlutabréf". Óskar álitsbeiðandi staðfestingar ríkisskattstjóra á að honum sé sú skattalega ráðstöfun heimil, en að honum beri ekki að beita þeirri uppgjörsaðferð sem í bindandi áliti ríkisskattstjóra nr. 2000-013 er þannig lýst:

"Ríkisskattstjóri telur að líta megi á að almennar reglur um söluhagnað og sölutap hlutabréfa gildi ekki hjá félögum sem hafa það að markmiði sínu að kaupa og selja hlutabréf. Þessir aðilar geti gert kaup og sölu upp á sama hátt og verslunarfyrirtæki þ.e.a.s. reiknað eins konar "vörunotkun" sem mismun á hlutabréfaeign í ársbyrjun, keyptum hlutabréfum á árinu og hlutabréfaeign í árslok. Í þessu tilviki væri mat hlutabréfanna til eignar í samræmi við kaupverð eða skráð verð í árslok. Á þennan hátt myndi tap færast til gjalda og hagnaður til tekna."

Álitaefni.

Óskað er staðfestingar ríkisskattstjóra á því, að álitsbeiðanda sé heimilt að fresta tekjufærslu söluhagnaðar sem myndast mun við afhendingu hlutabréfa í X hf., sem greiðslu hlutafjár í félagi sem fyrirhugað er stofna, með því að færa hagnaðinn til lækkunar á stofnverði hluta í því félagi.

Forsendur og niðurstöður:

Meginreglur um skattlagningu hagnaðar af sölu hlutabréfa er að finna í 18. gr. laga nr. 90/2003. Það frávik frá þeim reglum, sem fjallað er um í tilvitnuðu bindandi áliti ríkisskattstjóra nr. 2000-013 og lýst er málavaxtalýsingu hér að framan, tekur ekki til annarra atvika en þar greinir. Miðað við málavaxtalýsingu í álitsbeiðni tekur frávikið ekki til álitsbeiðanda vegna þeirra viðskipta sem leitað er álits um. Álitsbeiðanda ber því að haga skattuppgjöri sínu vegna fyrirhugaðra ráðstafana á hlutabréfum sínum í X í samræmi við ákvæði 18. gr. laga nr. 90/2003. Honum er jafnframt heimilt, á grundvelli 5. tölul. þeirrar lagagreinar, að fresta tekjufærslu hagnaðar er myndast mun við þá ráðstöfun og færa hann til lækkunar á stofnverði hluta sinna í því félagi, sem fyrirhugað er að hann taki þátt í að stofna með áðurnefndum hætti.

Bindandi álit ríkisskattstjóra:

Eftirfarandi álit ríkisskattstjóra miðast við fram færðar forsendur og að áform álitsbeiðanda gangi eftir svo sem þeim er lýst hér að framan.

Álitsbeiðanda er á grundvelli 5. mgr. 18. gr. laga nr. 90/2003 heimilt að fresta tekjufærslu söluhagnaðar sem myndast mun við afhendingu hlutabréfa í X hf., sem greiðslu hlutafjár í félagi sem fyrirhugað er stofna, með því að færa hagnaðinn til lækkunar á stofnverði hluta í því félagi.

Kæruréttur:

Bindandi álit þetta er kæranlegt til yfirskattanefndar samkvæmt ákvæði 1. mgr. 5. gr. laga nr. 91/1998, um bindandi álit í skattamálum. Kærufrestur er þrír mánuðir frá póstlagningardegi álitsins sem fram kemur í dagsetningu bréfs þessa. Kæra skal vera skrifleg. Skal koma fram í henni hvaða atriði álitsins sæta kæru og rökstuðningur fyrir kröfum. Frumrit eða endurrit hins kærða álits skal fylgja kæru, svo og þau gögn sem ætluð eru til stuðnings kærunni.

Ríkisskattstjóri