Niðurstöður átaks gegn ólöglegri atvinnustarfsemi
Ríkisskattstjóri, Lögreglan á höfuðborgarsvæðinu, Lögreglan á Suðurnesjum, Útlendingastofnun og Vinnumálastofnun voru sameiginlega með sérstakt átak gegn ólöglegri atvinnustarfsemi.
Á tímabilinu 18. september til 6. október 2017 var farið í 10 dagsheimsóknir og 5 kvöldheimsóknir og voru skoðuð 327
fyrirtæki og skráning 1.233 starfsmanna þeirra fyrirtækja. Flestar
heimsóknir voru til fyrirtækja í byggingariðnaði eða 62%, heimsóknir á veitinga-
og skemmtistaði voru 23%, þá voru 14% heimsókna á gististaði og í fyrirtæki í
ferðaþjónustu og 1% heimsókna var til fyrirtækja í annarri starfsemi. Kannað var
m.a. hvort atvinnurekendur stæðu skil á lögbundnum sköttum og gjöldum sem og
hvort einhverjir væru með starfsmenn í vinnu án tilskilinna leyfa.
Niðurstöður átaksins voru þær að langflestum málum lauk án athugasemda eða 227 (69%), 21 máli lauk með leiðbeinandi tilmælum ríkisskattstjóra, 7 málum lauk með breytingum (þar af einu máli með stöðvun atvinnustarfsemi) og 72 mál eru í vinnslu hjá ríkisskattstjóra.
Auk þess voru 36 einstaklingar og 19 fyrirtæki kærð af lögreglu fyrir samtals 51 brot. Flest vegna brota á lögum um atvinnuleyfi.
