Ákvarðandi bréf nr. 862/1998
Sveitaheimsóknir barna með tilliti til virðisaukaskatts.
30. júní 1998
G-Ákv. 98-862
Vísað er til bréfs yðar, dags. 11. apríl 1998, þar sem koma fram fyrirspurnir vegna sveitaheimsókna barna með tilliti til virðisaukaskatts.
Í meðfylgjandi bréfi frá forstöðumanni U, er eftirfarandi lýsing á sveitaheimsóknum skólabarna:
“Upplýsingaþjónustan hefur samið við ábúendur nokkurra bæja um að taka á móti börnum í skipulögðum ferðum á vegum skóla og foreldrafélaga og fræða þau um íslenskan landbúnað og sér um að kynna skólunum það sem þeim stendur til boða. U greiðir ábúendum kr. 110 fyrir hvert grunnskólabarn og kr. 50 fyrir hvert leikskólabarn sem kemur í þessar heimsóknir. Auk þess er gert ráð fyrir að bændurnir innheimti kr. 100 af hverjum gesti.
Lögð er áhersla á að á öllum þeim bæjum sem taka þátt í þessu starfi sé rekinn hefðbundinn búskapur með algengustu búfjártegundum okkar því sérstök áhersla er lögð á að börnin kynnist þeim auk þess sem á öllum bæjunum hefur verið sett upp kynningarefni s.s. veggspjöld með húsdýramyndum.”
Fyrirspurnunum verður svarað í sömu röð og þær eru settar fram í bréfi yðar.
- Ber viðkomandi bændum að leggja virðisaukaskatt ofan á þá fjárhæð sem þeir innheimta af hverjum gesti?
Svar:
Sveitaheimsóknir eru orðnar fastur liður í starfi margra grunn- og leikskóla. Meginmarkmið með heimsóknunum er að fræða gesti um hefðbundinn íslenskan búskap og gefa þeim færi á að kynnast algengustu búfjártegundunum í sínu eðlilega umhverfi. Í 3. mgr. 2. gr. laga nr. 50/1988, um virðisaukaskatt, er tæmandi upptalning á þeirri vinnu og þjónustu sem undanþegin er virðisaukaskattsskyldu. Ekki verður séð að umrædd þjónusta falli undir fyrrgreint ákvæði og er hún því virðisaukaskattsskyld.
- Er heimilt að líta þannig á að styrkur frá U, sem er ákveðin fjárhæð á barn, sé undanþegin virðisaukaskatti hjá viðtakanda?Svar:
Styrkþegi skal innheimta virðisaukaskatt af styrkjum ef styrkveitandi krefst þjónustu eða einhvers endurgjalds fyrir styrkinn. Samkvæmt samþykktum U er tilgangur félagsins að annast á breiðum grundvelli, kynningar og fræðastarf um landbúnaðinn og framleiðsluvörur hans og efla með því jákvæða ímynd bændastéttarinnar í huga þjóðarinnar. Til að uppfylla þennan tilgang, kaupir félagið meðal annars umrædda þjónustu af bændum og ber því að innheimta virðisaukaskatt af þeirri sölu.
- Skiptir máli í þessu sambandi hvort gestgjafarnir leggi stund á ferðaþjónustu auk hefðbundins búskapar?
Svar:
Nei, ekki skiptir máli í hvaða annarri starfsemi aðili er.
Ríkisskattstjóri
