Úrskurður yfirskattanefndar nr. 56/2013
Úrskurður nr. 56/2013
ÚRSKURÐUR YFIRSKATTANEFNDAR
Ár 2013, miðvikudaginn 20. febrúar, er tekið fyrir mál nr. 335/2012; krafa skattrannsóknarstjóra ríkisins um að A, kt. [...], verði gerð sekt vegna meintra brota á skattalögum. Í málinu úrskurða Ólafur Ólafsson, Anna Dóra Helgadóttir og Sverrir Örn Björnsson. Upp er kveðinn svofelldur
ú r s k u r ð u r :
I.
Með bréfi, dags. 8. nóvember 2012, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. [...], fyrir brot á lögum nr. 50/1988, um virðisaukaskatt, með áorðnum breytingum, framin vegna rekstraráranna 2007, 2008 og 2009.
Í bréfi skattrannsóknarstjóra ríkisins segir:
„A er gefið að sök eftirfarandi:
Vanræksla á skilum á virðisaukaskattsskýrslum. Vanframtalin skattskyld velta og útskattur.
A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa vanrækt að standa skil á virðisaukaskattsskýrslum til skattyfirvalda vegna uppgjörstímabilanna mars–apríl, maí–júní, júlí–ágúst, september–október og nóvember–desember rekstrarárið 2007 og vegna allra uppgjörstímabila rekstrarárin 2008 og 2009 og vanframtelja með því skattskylda veltu og virðisaukaskatt. Samkvæmt rannsókn skattrannsóknarstjóra ríkisins nemur vanframtalin skattskyld velta samtals kr. 27.760.377 og vanframtalinn útskattur samtals kr. 6.801.292.
Sundurliðast vanframtalin skattskyld velta og virðisaukaskattur svo sem hér greinir:
| Vanframtalin skattskyld velta | Vanframtalinn útskattur | ||
| Rekstrarár | Uppgjörstímabil | ||
| 2007 | jan. – feb. | 0 | 0 |
| 2007 | mars – apríl | 0 | 0 |
| 2007 | maí – júní | 0 | 0 |
| 2007 | júlí – ágúst | 5.378.240 | 1.317.669 |
| 2007 | sept. – okt. | 0 | 0 |
| 2007 | nóv. – des. | 0 | 0 |
| Samtals kr. | 5.378.240 | 1.317.669 | |
| 2008 | jan. – feb. | 0 | 0 |
| 2008 | mars – apríl | 0 | 0 |
| 2008 | maí – júní | 0 | 0 |
| 2008 | júlí – ágúst | 2.276.234 | 557.677 |
| 2008 | sept. – okt. | 2.026.843 | 496.577 |
| 2008 | nóv. – des. | 4.372.800 | 1.071.336 |
| Samtals kr. | 8.675.877 | 2.125.590 | |
| 2009 | jan.– feb. | 1.783.986 | 437.077 |
| 2009 | mars – apríl | 3.107.229 | 761.271 |
| 2009 | maí – júní | 1.944.119 | 476.309 |
| 2009 | júlí – ágúst | 3.987.455 | 976.926 |
| 2009 | sept. – okt. | 1.879.455 | 460.466 |
| 2009 | nóv. – des. | 1.004.016 | 245.984 |
| Samtals kr. | 13.706.260 | 3.358.033 | |
| Samtals öll árin kr. | 27.760.377 | 6.801.292 |
Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.
Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.
Við endurákvörðun á virðisaukaskatti vegna rekstraráranna 2007, 2008 og 2009 hefur A verið gert að sæta álagi á vangreiddan virðisaukaskatt, kr. 680.129, er komi til frádráttar við ákvörðun sektarfjárhæðar.
Þess er krafist að A verði með úrskurði yfirskattanefndar gert að sæta sekt í samræmi við framangreint.“
Af hálfu skattrannsóknarstjóra ríkisins er málavöxtum lýst í greinargerð, dags. 8. nóvember 2012, sem fylgdi kröfugerðinni.
II.
Með bréfi yfirskattanefndar, dags. 13. nóvember 2012, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 41. gr. laga nr. 50/1988, um virðisaukaskatt. Engar athugasemdir hafa borist frá gjaldanda.
III.
1. Með bréfi skattrannsóknarstjóra ríkisins, dags. 8. nóvember 2012, er gerð sú krafa að gjaldanda, A, verði gerð sekt samkvæmt þargreindum ákvæðum 40. gr. laga nr. 50/1988, um virðisaukaskatt. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hann mæli því ekki í gegn að það sæti sektarmeðferð fyrir nefndinni.
2. Sektarkrafa skattrannsóknarstjóra ríkisins í máli þessu er byggð á niðurstöðum rannsóknar embættisins á bókhaldi og skattskilum gjaldanda vegna rekstraráranna 2007 til og með 2009, sbr. skýrslu um rannsóknina, dags. 28. desember 2011, þar sem fram kom að á rannsóknartímabilinu hefði gjaldandi starfað sjálfstætt í byggingariðnaði. Rannsókn skattrannsóknarstjóra ríkisins hófst formlega hinn 22. febrúar 2011 og beindist að virðisaukaskattsskilum gjaldanda. Var rannsóknin einkum byggð á upplýsingum sem fram komu við skýrslutökur af gjaldanda dagana 22. og 30. nóvember 2011, á sölureikningum gjaldanda og upplýsingum úr upplýsingakerfum ríkisskattstjóra. Með bréfi, dags. 13. desember 2011, sendi skattrannsóknarstjóri gjaldanda skýrslu um rannsóknina, dags. 12. desember 2011, og gaf honum kost á að tjá sig um efni hennar. Athugasemdir voru ekki gerðar af hálfu gjaldanda. Í framhaldi af þessu tók skattrannsóknarstjóri ríkisins saman nýja skýrslu um rannsóknina, dags. 28. desember 2011, sem var efnislega samhljóða hinni fyrri að viðbættum kafla um lok rannsóknarinnar.
Í skýrslu skattrannsóknarstjóra ríkisins, dags. 28. desember 2011, voru helstu niðurstöður rannsóknarinnar dregnar saman með svofelldum hætti:
„Niðurstöður rannsóknar á bókhaldi og skattsskilum skattaðila eru:
·1 Ekki hafa verið staðin skil á virðisaukaskattsskýrslum, vegna uppgjörstímabilanna mars-apríl. maí-júní, júlí-ágúst, september-október og nóvember-desember 2007, vegna uppgjörsímabilanna maí-júní, júlí-ágúst, september-október og nóvember-desember 2008 og vegna allra uppgjörstímabila rekstrarársins 2009.
·2 Skattaðili var ekki skráður á virðisaukaskattsskrá frá 30.06.2008.
·3 Bókhald hefur ekki verið fært.
·4 Skattskyld velta er vantalin.
·5 Útskattur er vantalinn.
·6 Engin kostnaðargögn hafa verið afhent.“
Þá gerði skattrannsóknarstjóri ríkisins tölulega grein fyrir niðurstöðum rannsóknarinnar í töflu í niðurlagi skýrslu sinnar. Þar kom fram að skattskyld velta gjaldanda væri vantalin um 5.378.240 kr. rekstrarárið 2007, um 8.675.877 kr. rekstrarárið 2008 og 13.706.260 kr. rekstrarárið 2009. Þá væri útskattur vantalinn um samtals 6.801.292 kr. greind ár. Innskattur væri talinn nema 86.328 kr. uppgjörstímabilið janúar-febrúar 2007.
Af hálfu skattrannsóknarstjóra ríkisins var mál gjaldanda sent ríkisskattstjóra til meðferðar, sbr. 5. mgr. 39. gr. laga nr. 50/1988, um virðisaukaskatt, sbr. bréf skattrannsóknarstjóra ríkisins, dags. 29. desember 2011. Á grundvelli rannsóknar skattrannsóknarstjóra ríkisins og í framhaldi af bréfi til gjaldanda, dags. 12. apríl 2012, sem gjaldandi svaraði ekki, endurákvarðaði ríkisskattstjóri með úrskurði, dags. 1. júní 2012, virðisaukaskatt gjaldanda árin 2007, 2008 og 2009. Samkvæmt úrskurðinum var skattskyld velta ákvörðuð 6.518.374 kr. rekstrarárið 2007, 8.675.877 kr. rekstrarárið 2008 og 13.706.260 kr. rekstrarárið 2009, og kom fram að þær fjárhæðir væru í samræmi við niðurstöður skattrannsóknarstjóra ríkisins. Samkvæmt framangreindu og að teknu tillit til innskatts 86.328 kr. árið 2007 varð virðisaukaskattur til greiðslu 1.510.676 kr. árið 2007, 2.125.590 kr. árið 2008 og 3.358.034 kr. árið 2009 auk álags samkvæmt 1. og 2. mgr. 27. gr. laga nr. 50/1988. Gjaldandi nýtti sér ekki heimilaðar málskotsleiðir vegna þessa úrskurðar ríkisskattstjóra.
3. Fram kemur í skýrslu skattrannsóknarstjóra ríkisins, dags. 28. desember 2011, að gjaldandi hafi staðið skil á virðisaukaskattsskýrslum vegna uppgjörstímabilanna janúar-febrúar 2007 og janúar-febrúar og mars-apríl 2008. Við skýrslutöku 30. nóvember 2011 voru virðisaukaskattsskýrslur vegna uppgjörstímabilanna janúar-febrúar 2007 og janúar-febrúar og mars-apríl 2008 lagðar fyrir gjaldanda og staðfesti gjaldandi undirritun sína á skýrslurnar og kvaðst hafa séð um gerð þeirra. Sagði gjaldandi skýrslurnar vera byggðar á útgefnum reikningum og taldi gjaldandi skýrslurnar vera réttar. Kvaðst gjaldandi hafa verið í rugli og stundað spilakassa á þessum tíma og að það hefði ekki verið meðvituð ákvörðun að skila ekki virðisaukaskattsskýrslum vegna annarra tímabila. Þá kemur fram að virðisaukaskattsnúmeri gjaldanda hafi verið lokað hinn 30. júní 2008 eftir bréfaskriftir til gjaldanda frá skattstjóranum í Reykjavík og án þess að gjaldandi hreyfði nokkrum andmælum þar um.
Gjaldandi afhenti skattrannsóknarstjóra ríkisins átta sölureikninga, þ.e. sölureikninga nr. 42-49, hinn 22. febrúar 2011, og sex sölureikninga, þ.e. sölureikninga nr. 1, 5-8 og 50, í mars 2011. Kvaðst gjaldandi ekki hafa fundið þá þrjá sölureikninga sem vantaði inn í númeraröðina og taldi að þeir hefðu verið ógildir. Í skýrslunni kemur fram að gjaldandi hafi ekki fært eða látið færa bókhald vegna starfsemi sinnar.
Í skýrslu skattrannsóknarstjóra ríkisins er gerð grein fyrir rannsókn á skattskyldri veltu og útskatti gjaldanda. Við skýrslutöku 30. nóvember 2011 voru útgefnir sölureikningar gjaldanda rekstrarárin 2007, 2008 og 2009 lagðir fyrir hann og staðfesti gjaldandi að hann hefði gefið þá út og að þeir hafi allir fengist greiddir. Sagðist gjaldandi hafa fengið reikningana greidda í reiðufé, enda hefði hann ekki notað bankareikninga síðan 1980. Er tekið fram í skýrslunni að skattrannsóknarstjóri ríkisins hafi ekki fundið neina bankareikninga með hreyfingum í nafni gjaldanda að frátöldum gjaldeyrisreikningi með einu innleggi og einni úttekt árið 2009. Þá er í skýrslu skattrannsóknarstjóra ríkisins gerð grein fyrir fjárhæð skattskyldrar veltu gjaldanda á árunum 2007, 2008 og 2009 samkvæmt rannsókn skattrannsóknarstjóra ríkisins. Hafi vanframtalin skattskyld velta gjaldanda numið 5.378.240 kr. rekstrarárið 2007 (útskattur 1.317.669 kr.), 8.675.877 kr. (útskattur 2.125.590 kr.) rekstrarárið 2008 og 13.706.260 kt. (útskattur 3.358.033 kr.) rekstrarárið 2009. Samkvæmt framansögðu hafi skattskyld velta því verið vantalin um samtals 27.760.377 kr. og útskattur um samtals 6.801.292 kr. umrædd ár.
Í kafla um rannsókn á innskatti gjaldanda er greint frá því að gjaldandi hafi talið fram innskatt að fjárhæð 86.328 kr. uppgjörstímabilið janúar-febrúar 2007. Þá kemur fram að engin gögn hafi verið afhent um mögulegan innskatt gjaldanda.
4. Gjaldandi hefur sem fyrr segir ekki gert athugasemdir í tilefni af sektarkröfu skattrannsóknarstjóra ríkisins og við skýrslutökur, sem fram fóru hjá skattrannsóknarstjóra vegna rannsóknar málsins, kom fram viðurkenning gjaldanda á því að hann hefði ekki staðið skil á virðisaukaskattsskýrslum og innheimtum virðisaukaskatti árin 2007, 2008 og 2009. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 108. gr. laga nr. 88/2008, um meðferð sakamála.
Eins og rakið er að framan eru tölulegar niðurstöður samkvæmt rannsókn skattrannsóknarstjóra ríkisins á skattskilum gjaldanda vegna áranna 2007, 2008 og 2009 byggðar á útgefnum sölureikningum gjaldanda sem hann afhenti skattrannsóknarstjóra vegna rannsóknar málsins. Greindir sölureikningar eru að fjárhæð 8.115.378 kr. rekstrarárið 2007, 10.801.467 kr. rekstrarárið 2008 og 17.064.293 kr. rekstrarárið 2009 og reiknaðist skattskyld velta gjaldanda í samræmi við það 6.518.374 kr. rekstrarárið 2007, 8.675.877 kr. rekstrarárið 2008 og 13.706.260 kr. rekstrarárið 2009 og útskattur 1.597.004 kr. árið 2007, 2.125.590 kr. árið 2008 og 3.358.033 kr. árið 2009. Eru þetta þær fjárhæðir sem tilgreindar eru sem tölulegar niðurstöður rannsóknarinnar um vantalda skattskylda veltu og virðisaukaskatt (útskatt) að teknu tilliti til skattskyldrar veltu að fjárhæð 1.140.134 kr. og útskatts að fjárhæð 279.335 kr. sem gjaldandi gerði grein fyrir á virðisaukaskattsskýrslu uppgjörstímabilið janúar-febrúar 2007. Umræddir sölureikningar voru lagðir fyrir gjaldanda við skýrslutöku hjá skattrannsóknarstjóra ríkisins 30. nóvember 2011 og staðfesti gjaldandi að hafa gefið sölureikningana út og að þeir hefðu fengist greiddir. Samkvæmt þessu og að virtum gögnum málsins þykir ekkert komið fram sem gefur tilefni til annars en að miða við þær fjárhæðir innheimts virðisaukaskatts sem sölureikningar gjaldanda bera með sér. Af hálfu gjaldanda hefur ekkert komið fram um tilefni til frekari frádráttar innskatts en að framan greinir. Verður því byggt á niðurstöðum rannsóknarskýrslu um þann þátt málsins.
Fullsannað þykir samkvæmt því sem að framan er rakið og að öðru leyti með stoð í gögnum málsins, m.a. framburði gjaldanda við skýrslutökur hjá skattrannsóknarstjóra ríkisins, að gjaldandi, sem skyldur var til þess að standa skil á virðisaukaskatti, sbr. 1. mgr. 15. gr. og 1. og 2. mgr. 24. gr. laga nr. 50/1988, hafi á saknæman hátt vanrækt að standa skil á virðisaukaskattsskýrslum tilgreind uppgjörstímabil árin 2007, 2008 og 2009 og þannig vanrækt að gera grein fyrir virðisaukaskatti til greiðslu samtals að fjárhæð 6.801.292 kr. uppgjörstímabilin júlí-ágúst 2007, júlí-ágúst, september-október og nóvember-desember 2008 og janúar-febrúar til og með nóvember-desember 2009, sbr. sundurliðun í kröfubréfi skattrannsóknarstjóra ríkisins. Varðar þetta gjaldanda sekt samkvæmt 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995.
Ákvarða ber gjaldanda, A, sekt samkvæmt framangreindum ákvæðum 1. mgr. 40. gr. laga nr. 50/1988, sbr. 3. gr. laga nr. 42/1995, vegna vanrækslu á skilum virðisaukaskatts og virðisaukaskattsskýrslna sem að framan greinir. Samkvæmt breytingum á refsiákvæðum skattalaga, sem gerðar voru með lögum nr. 42/1995 og tóku gildi 9. mars 1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin, þó að teknu tilliti til álags. Líta ber til þess að gjaldandi gekkst greiðlega við brotum sínum. Að þessu virtu og að teknu tilliti til álags samkvæmt 2. mgr. 27. gr. laga nr. 50/1988 þykir sekt gjaldanda hæfilega ákveðin 13.000.000 kr. til ríkissjóðs.
Úrskurðarorð:
Gjaldandi, A, greiði sekt að fjárhæð 13.000.000 kr. til ríkissjóðs.
